طريقه عمل الشكلمه

أكيد كلنا بنحب الحلويات .... وأكيد برضه بنموت في الشكلمه , وفي ناس كتير زيي بيحبوا يعملوا كل حاجتهم بنفسهم , عشان كده جبتلكم الوصفه ومجربه ومضمونه مليون بالميه .

بصي يا ست الستات مفيش مقادير أسهل ولا أرخص من كده

مقادير الشكلمه :

• كوب جوز هند ناعم .
• ربع كوب سكر ناعم .
• بياض بيضه .
• فانليا .



طريقه عمل الشكلمه :

انا في المقادير حبيت ابسطهالك يعني شوفي أنتي عايزه تعملي كام كوبايه جوز هند وظبطي الباقي عليها .
أهم حاجه في عمل الشكلمه هو ضرب بياض البيض مع الفانليا حتي يصبح مثل الكريمه بمعني تاني عامل رغوه بيضه كثيفه , وبعدين نحط عليها السكر الناعم ونضربهم تاني كويس وأخيرا ً نحط جوز الهند الناعم ونقلبه بالمعلقه , ونجيب صنيه مدهونه كويس بالزيت ونغسل إيدينا بالماء ونكور الشكلمه أو نضع عجينه الشكلمه داخل قمع ونشكل بيه العجينه ونرسها بالصنيه , وأخيرا ً يجي وقت تزينها للي يحب , ممكن نحط كريز أو أي مكسرات عندكم , وبعدين نضعها بالفرن حتي تحمر من تحت ونحطها تحت الشوايه تأخد لون ذهبي ونسيبها لما تبرد وبعدين نشلها من الصنيه عشان ما تتكسرش وبألف هنا وشفا للكل .
طلب لكل اللي يعملها يدعيلي ويقولي عملت إيه معاه .